“Leer es comprender. El acto de leer es entendimiento. Leer y comprender es vivir”.
Álvaro Pombo
Premio Cervantes 2024

Nun lugar moi querido, cuxo nome non necesito citar e moito menos quero esquecer, tomou hoxe vida Don Quixote, que se botou aos camiños para auxiliar aos necesitados e socorrer aos aflixidos; con el ía o seu leal escudeiro Sancho, amigo fiel, e non faltaron tampouco o barbeiro, o cura, a ama, o mesoneiro, os arrieiros, os descomunais xigantes, as doncelas e a sen par Dulcinea, flor da fermosura. Coma se fose por intervención do mago Frestón, desfilaron todos na aula de lectura por boca duns lectores, pequenos e grandes, entusiasmados coas aventuras de tan valoroso cabaleiro andante.
Ben que rimos coas súas tolemias!
E segundo Don Quixote ía “enderezando tuertos” dabámosmos conta, case sen querelo, de que ler é comprender o mundo e entender a vida, que cos libros podemos converter a vida en soños e os soños en vida, e que nestes artefactos marabillosos compostos de páxinas encadernadas, na literatura, sempre atoparemos unha guía para orientarnos no labirinto da existencia.
Lendo, soñando, pensando entenderemos mellor a nosa condición perecedoira e aguantaremos con máis firmeza as pasadas da escoba do tempo, que a todos nos ha de varrer. Non sei se a lectura nos vai facer mellores, pero é seguro que nos fará menos estúpidos.

José Manuel López Regueiro

Este mércores celebramos con moita ilusión o Día Internacional do Libro no Colexio Seminario Menor, cunha actividade moi especial que reuniu a toda a nosa comunidade educativa e á de Casa do Neno: unha lectura pública do Quixote, na que participaron os alumnos e alumnas de Primaria, Secundaria e Bacharelato.

A aula de lectura converteuse nun espazo compartido de cultura e palabras, onde don Quixote e Sancho Panza cobraron vida grazas ás voces de nenos, mozos e mozas, profesores e persoal non docente que, por uns minutos, fixéronse viaxeiros da literatura. Foi un momento para celebrar xuntos a paixón polos libros, o poder das historias e a maxia de ler en compañía.

Pero non quedou aí a cousa. Durante a xornada, tamén recomendamos o chat “Xente Lendo”, unha iniciativa que anima a compartir lecturas, opinións e descubrimentos literarios. E para seguir cultivando ese amor polos libros, repartimos o noso Pasaporte Lector, unha ferramenta divertida para animar ao alumnado a seguir lendo durante todo o ano.

Unha celebración chea de letras, risos e moita participación que demostra que a lectura segue moi viva entre nós. Porque como dicía Cervantes: “El que lee mucho y anda mucho, ve mucho y sabe mucho.”

Hoxe martes ás 10.30 h. tivemos unha Misa de Pascua na Capela Xeral do colexio. Na capela, a luz suave do sol entraba polas xanelas, iluminando o altar decorado con flores brancas, símbolo de pureza e resurrección. Todos os estudantes, profesores e persoal do centro reuníronse en silencio para vivir un momento de celebración da Pascua.
O Señor Reitor, coa súa habitual proximidade e sabedoría, tomou a palabra ao final da homilía, convidándonos a reflexionar sobre a mensaxe profunda desta celebración. Falounos da luz, esa luz divina que non só ilumina o noso camiño, senón que tamén habita no noso interior. “A Resurrección de Xesús”, dixo, “é un recordatorio de que todos temos dentro de nós unha luz capaz de transformar as nosas vidas e as dos demais. Só necesitamos buscala con fe e esperanza”.
Durante a celebración, pedimos ao Señor polo descanso eterno do papa Francisco e unímonos en oración, a todo o Pobo de Deus, coa esperanza na resurrección. A misa, chea de cantos e oracións, terminou cun momento de reflexión persoal.
A continuación, o alumnado e os profesores tivemos un recreo festivo con cocholate e rosca.