O pasado venres celebrouse con gran emoción e solemnidade o acto de graduación das alumnas e alumnos de 2º de Bacharelato do curso 2024-25. A xornada reuniu a estudantes, familias, amigos e profesorado para conmemorar o peche dunha etapa chea de aprendizaxes, esforzo e crecemento persoal.

Os actos comezaron cunha misa na capela xeral, á que asistiron todos os membros da promoción xunto coas súas familias e amizades. Foi un momento de recollemento e agradecemento, onde se puideron compartir sentimentos e recordos, e pedir por un futuro esperanzador para todos os graduados.

A continuación, no salón de actos, tivo lugar a cerimonia académica, presidida por Don José, o Reitor do centro. O ambiente estivo cargado de emoción e orgullo, tanto polos alumnos como polas súas familias e docentes. Abriron o acto os discursos dalgúns alumnos, nos que houbo espazo para a lembranza, os agradecementos e tamén algún sorriso cómplice.

Tomou tamén a palabra a madriña da promoción, Dona Rosalía, que dedicou unhas fermosas palabras de ánimo e inspiración aos seus afillados e afilladas, animándoos a seguir soñando e loitando polo que queren ser. O Director do centro, Don Alberto, e o titor do curso, achegaron tamén os seus discursos, cheos de afecto, recoñecemento e orgullo polo camiño percorrido polos estudantes.

Un dos momentos máis emotivos foi a imposición das becas, xunto coa entrega da insignia de prata do Seminario, dos diplomas e das orlas. Cada alumno subiu ao escenario para recoller os froitos simbólicos do seu esforzo, entre aplausos e algunha bágoa de emoción.

Para poñer o broche final a esta inesquecible xornada, todos os presentes compartiron uns pinchos, nun ambiente distendido e cheo de ledicia, onde se mesturaban as despedidas coas ilusións do que está por vir.

Foi, sen dúbida, unha celebración chea de significado que quedará na memoria de todos como un fermoso peche desta etapa e o inicio dun novo camiño.

« ‹ de 36 › »

Este martes 13 de maio, con motivo da celebración da Semana das Letras Galegas, tivemos o pracer de recibir a Rafael Casás, que nos deu unha charla moi emotiva falando da súa avoa e tía.
A Real Academia Galega acordou dedicar o Día das Letras Galegas 2025 á poesía popular oral, personificado en Adolfina e Rosa Casás Rama , de Cerceda, Eva Castiñeira Santos, de Muxía e as Pandeireteiras de Mens, de Malpica. É unha representación colectiva desta poesía popular oral, que acompaña a nosa sociedade desde sempre.
O noso convidado, neto de Rosa e sobriño neto de Adolfina, compartiu momentos inesquecibles da súa vida. Explicou como era a súa vida familiar, os momentos de xuntanza, que sempre remataban con cancións arredor dunha mesa. A pesar das penurias económicas, que pasaron estas mulleres, e da súa vida humilde, nunca perderon a alegría e continuamente celebraban con algún instrumento improvisado e cancións populares os seus encontros.
Houbo tamén un recordo para a vida da aldea, de como eran esas casas e algúns artigos curiosos, que os nosos alumnos nunca viran e que os deixaron abraiados.
Na década de 1980 coñeceron a Dorothé Schubarth, que foi a investigadora que recolleu o seu canto para o Cancioneiro popular galego (1982), destacando delas a súa variedade de melodías, a orixinalidade das coplas e a capacidade de improvisación. Disto, tamén nos falou o seu familiar, recordando que a súa habilidade para o canto facía que fosen requiridas para cantar nos traballos comunais e nas foliadas.
Gracias, Rafael Casás, por facernos pasar un momento tan agradable.

Susana Ordóñez

O pasado luns 12 de maio celebramos no Colexio Seminario Menor unha xornada moi especial e emotiva: o Día da Familia e Festa de Fin de Curso, un encontro que xuntou a toda a comunidade educativa nun ambiente festivo, cheo de ledicia, xogos e emocións compartidas.

Desde primeira hora da mañá, o colexio encheuse de sorrisos e ilusión coa chegada do alumnado de infantil e primaria de Casa do Neno, xunto cos seus compañeiros de secundaria e bacharelato do Seminario Menor. Xunto a eles, tamén participaron os pais, nais, familiares, así como o claustro de profesores e o persoal non docente, que non quixeron perderse esta xornada tan sinalada.

O día comezou cun momento especialmente significativo: unha ofrenda floral á Virxe María, celebrada na capela xeral, en honra ao mes mariano. Nese intre de recollemento e espiritualidade, toda a comunidade puido agradecer o curso vivido e poñer nas mans de María as esperanzas e ilusións de cada familia.

A continuación, as actividades lúdicas tomaron o protagonismo. Os máis pequenos gozaron dos inchables, mentres que outros se divertiron con diversos xogos organizados no pavillón. A música, as risas e a complicidade entre nenos, mozos e adultos fixeron que o recinto do colexio se convertese nun auténtico espazo de encontro e celebración.

Ao mediodía, compartiuse unha comida tipo picnic, pensada para que todos os asistentes puidesen disfrutar dun xantar informal, ao tempo que se reforzaban os lazos de convivencia entre as familias, os educadores e o alumnado.

A xornada concluíu cun sabor a gratitude e alegría, sendo un reflexo do espírito que define ao Seminario Menor: unha verdadeira familia educativa, onde a formación, a fe e a convivencia camiñan sempre da man.