Comezou co alumnado de 2º da ESO o proxecto da área sociolingüística «Os piares da terra», un proxecto que pretende achegar o alumnado á Alta Idade Media, á implantación do feudalismo e á configuración dunha nova realidade política, económica, social e cultural en Europa.
Un dos eixes fundamentais do proxecto será o estudo dos novos reinos coma o Franco ou o visigodo así coma a sociedade sueva, e a súa presenza no territorio da actual Galicia e da súa evolución no contexto da Alta Idade Media. O alumnado analizará como se organizaba esta sociedade e como se foron configurando as relacións de poder, dependencia e privilexio que caracterizarían posteriormente a sociedade feudal. Deste xeito, comprenderán o feudalismo como resultado dun proceso histórico no que interviñeron diferentes factores políticos, económicos e sociais.
O proxecto comezou cun desafío inicial destinado a espertar a curiosidade do alumnado e favorecer a súa inmersión no período histórico. Ao entrar na aula, atopáronse cun espazo tematizado, ambientado con símbolos e elementos representativos da época medieval, que serviu para activar os seus coñecementos previos e formular as primeiras preguntas e hipóteses.
A continuación, visualizaron unha película relacionada co período histórico, que lles permitiu identificar e traballar conceptos abordados previamente nas clases, como os estamentos sociais, as relacións de vasalaxe, o poder da nobreza e da Igrexa, e o papel das lendas nesta época. A actividade serviu tamén para desenvolver unha mirada crítica, comparando a representación cinematográfica coa realidade histórica e diferenciando entre os elementos baseados en feitos históricos e aqueles relacionados coa mitificación ou fantasía da Idade Media.
Rematada esta primeira fase, constituíronse os equipos de traballo e distribuíronse os diferentes roles, favorecendo a responsabilidade individual, a cooperación e a participación activa de todo o alumnado.
Finalmente, os estudantes plasmaron as súas impresións e valoracións sobre o desafío inicial mediante a elaboración dunha crítica, na que recolleron as súas primeiras sensacións e formularon novas preguntas sobre o período que comezan a investigar.
Así, «Os piares da terra» inicia unha viaxe pola Alta Idade Media na que o alumnado deberá investigar, formular hipóteses, contrastar información, interpretar fontes e traballar cooperativamente para comprender a transformación da sociedade europea e a configuración dos diferentes estamentos e relacións de poder.
