Como colofón da súa Semana Cultural, o Seminario Menor ven de celebrar o Encontro de Antigos Alumnos e Amigos do Seminario. Ao longo da mañá houbo tempo para percorrer as exposicións, os espazos nos que moitos deles habitaron durante varios cursos e intercambiar recordos e impresións do seu paso por Belvís.
Aínda que se trataba dun encontro interxeneracional con distintas promocións, tiveron un lugar destacado os que remataron aquí os seus estudos fai agora 50 e 25 anos, deixando como recordo simbólico desta xornada, unha nova árbore nos espazos axardinados do centro formativo. A xornada completouse coa celebración da Santa Misa pedindo por aqueles que xa non están e unha comida á que se sumaron preto dun centenar de comensais.