Como non podía ser doutra maneira, a festa de san Tomé de Aquino non pasou desapercibida no Seminario Menor. El é o patrón dos estudantes de Secundaria e Bacharelato. Por iso o día 28 de xaneiro, foi un día de celebración.
Coma facemos os cristiáns os días de festa, primeiro participamos na Misa na Capela Xeral e que foi presidida polo Sr. Reitor. Na súa homilía animou aos alumnos a seguir con ánimo na súa tarefa de dar o mellor de cada un, nos estudos. Comentou que os resultados da primeira avaliación foron, en xeral, bos, pero que poden ser moito mellores.
E despois da Misa… a festa; que neste día é un concurso. Versou sobre o Ano Santo Compostelán, como xa o fixeramos o ano pasado. Esta vez, a introdución percorreu coma foron as peregrinacións a Santiago desde o descubrimento da tumba do Apóstolo Santiago. Guiáronnos neste percorrido o cóengo López Ferreiro, o Cardeal Quiroga Palacios e D. Elías Valiña, que lle explicaron a dúas peregrinas coma foran as peregrinación ao longo dos séculos.
Rematada a presentación, comezou o concurso: 78 preguntas con catro posibles respostas tendo todas elas relación co Ano Santo: arquitectura, literatura, o Camiño, a cidade de Santiago, os peregrinos,… Os tres alumnos que responderon mais e mais rápido foron de 4º da ESO, que foi o curso gañador. Noraboa!!!
Foi un día distinto, no que fomos aprendendo mais sobre o fenómeno da peregrinación para venerar os restos do Apóstolo Santiago e do que somos testemuñas cada día, vendo chegar a esta nosa cidade milleiros de peregrinos.
Comisión de San Tomé