O pasado 24 de febreiro o mundo estremecía ao comprobar que o medo a un novo conflito bélico se facía realidade. Tropas rusas invadían territorio de Ucraína, e Europa volvía ser territorio en guerra.
A nosa comunidade educativa non pode ser allea ao compromiso de ser construtores de paz. Convocados polos cristiáns de Ucraína en Galicia, participamos na tarde do xoves, na igrexa de santa Susana, nunha oración ecuménica pola paz. Coa presenza do Sr. Arcebispo, o seu bispo auxiliar e moitos católicos, ortodoxos, evanxélicos, anglicanos e outras comunidades cristiás unidos para significar que os seguidores de Cristo temos a misión de construír a paz.