Saúdo do Reitor.

Para este curso… Facer do ordinario algo extraordinario!

 

 Cada curso ten o seu propósito e o deste 2.025-26 ben podería ser facer do ordinario algo extraordinario. E sen dúbida o mellor recurso para acadar este obxectivo é  ser amables no que facemos e vivimos. O adxectivo amable encontra dúas acepcións no dicionario da RAG. A Academia  dinos que amable é en primeiro lugar, alguén digno de ser amado, e en segundo lugar alguén afable, compracente e afectuoso. Ser amable non é un estado de ánimo nin algo que se poida aparentar, senón que se traballa e exercita cada día. É fácil pensar que ser amable se amosa con palabras, na súa forma e contido, pero  invítote a que esta calidade a fagas propósito para este curso e a leves máis lonxe, ata o punto de converter o ordinario en algo extraordinario.

 As nosas expresións e manifestacións exteriores son o mellor espello do que vivimos por dentro e manifestan de maneira clara afabilidade ou falta dela. Por que a proposta de cultivar a virtude da amabilidade e non outra?. Pois porque fai a vida máis agradable a todos e céntranos no verdadeiramente importante. Pensamos que os cambios veñen de fóra cara a dentro, pero como nos expresamos e a nosa forma de estar no mundo configura o noso interior para percibir a amabilidade nos que temos ao noso arredor. Porque a amabilidade non é o que fas senón quen es.

Agora que comezamos non esquezas: “Cando poidas elixir entre ter a razón ou ser amable, elixe ser amable”.

 

José M. Taibo García

                                                                            Reitor