Os alumnos de 2º de bacharelato, entre exame e exame, aproveitaron hoxe para achegarse ao Salón Teatro e ver a última función que o Centro Dramático Galego nos ofrece, Se fosen turistas, levarían gafas de sol. Trátase dunha coprodución internacional entre as compañías galegas Limiar Teatro e Crémilo, as entidades portuguesas Teatro Nacional D. Maria II de Lisboa e Comedias do Minho, a arxentina Cía. Nacional de Fósforos de Bos Aires e a uruguaia El Mura de Montevideo.
Baixo ese curioso título, a obra fíxonos reflexionar sobre a emigración, pasada e presente, e afondar na memoria da emigración a partir das historias persoais do equipo do espectáculo. As súas propias experiencias familiares supoñen en si mesmas unha celebración da vida, da supervivencia e do camiño percorrido a partir dunha trama que se inicia no momento da separación de dúas irmáns no porto de Vigo nos anos 50. E todo iso, dun xeito lúdico e cunha proposta escénica novidosa na que puidemos gozar de música creada en directo mediante loops, disparadores electrónicos, pedais e procesadores, manipulación da iluminación nas mans dos intérpretes e o uso de micromappings. Sen dúbida, pagou a pena, a pesar da chuvia!
Begoña Campaña