Moitas veces queremos percorrer moitos quilómetros para buscar sensacións novas que nos fagan sentirnos especiais: visitar espazos naturais espectaculares, vivir uns días nunha cultura distinta á nosa, descubrir persoas que atoparon a felicidade de diferentes xeitos. Este soño está ao alcance de moi poucos. As tarefas da vida diaria enchen as horas da nosa existencia e parece que non nos chega o tempo para nada. Quizais poida haber un xeito no que podamos acercarnos a estas nosas ideas e sen moverse moito.
A biblioteca do noso Seminario é unha ventá aberta á lectura, tanto no Centro coma na casa; é un espazo onde podemos avanzar na adquisición do coñecemento das distintas áreas que compoñen o curriculum escolar; é tamén un lugar para descubrir novas metas xa que nos levan a abrir a mente e xerar novas ideas.
No día en que celebramos o “Día das Bibliotecas”, invítovos a usar a Biblioteca do Seminario. Gracias ao traballo de moitos, a día de hoxe, temos catalogados 23.634 títulos, e aínda quedan libros por fichar. O ano pasado, acadouse a cifra de 84 préstamos o que supuxo que case cada alumno pediu dous libros para ler. As consultas na propia biblioteca foron moitas mais.
O bibliotecario indio Ranganathan deixou escrito: “Os libros están para usarse. A cada lector o seu libro. A cada libro o seu lector”. Anímovos a ler, non so o que vos manden os profesores. Mergulládevos na biblioteca para ter sensacións novas que nos fagan sentirnos especiais.
M. Jesús Formoso
