O xoves veu a darnos unha conferencia o Prof. Juan Jesús Gestal Otero, catedrático emérito da Universidade de Santiago de Compostela e da que foi decano da Facultade de Medicina. O tema foi moi interesante: “As pandemias ao longo da historia da humanidade”. Grazas ao Programa “A Ponte” da Universidade compostelá, puidemos ir percorrendo a nosa historia da man das pandemias: a peste, a varíola, a polio, a gripe,… Estas foron enfermidades que afectaron aos nosos antergos e que causaron moitísimas mortes. Pero tamén nos falaron das medidas que se foron tomando para evitar que estas infeccións fosen máis letais. Así escoitamos como se tomaron as primeiras medidas sanitarias, xa fai séculos, e que son moi parecidas as tomadas nesta nosa pandemia da Covid. Por suposto, tamén fomos vendo como xurdiron as vacinas para atallar estas pandemias.
Pero, o tema principal foi a Covid. O Prof. Gestal, bo coñecedor desta pandemia, foi expoñendo o que sabemos desta enfermidade ao mesmo tempo que nos foi tranquilizando sobre o que estamos a vivir nestes intres. Non podía faltar preguntas sobra a varíola do mono, que foi explicada de xeito positivo xa que contamos con ferramentas para combatila.
Falar de enfermidades é complicado, pero o Prof. Gestal mostrounos de xeito ameno unha realidade da que non podemos estar alleos, xa que é parte da nosa vida, coa que debemos convivir e tamén fíxonos un chamamento a ter responsabilidade cando nos vexamos afectados.
M. Jesús Formoso
