Capelas

A arquitectura do edificio estrutúrase a partir dun punto central, que é a chamada Capela Xeral. A partir de aí, séguese unha certa simetría no resto dos espazos.

Esta capela ten forma de barca invertida, á fronte da cal está Cristo, presente no Sagrario. Custodiando os laterais atópanse oito grandes ventanais coas imaxes de santos que deben ser modelos para nós:

• Santiago apóstol, presente en todo canto é e significa a nosa cidade.
• Santo Tomé de Aquino, patrono da educación secundaria e universitaria.
• San Rosendo, bispo de Iria e Mondoñedo, fundador do mosteiro de Celanova. O día da súa festa colocouse a primeira pedra do edificio que nos acolle.
• San Xoán de Ávila, doutor da Igrexa, patrono do clero secular español.
• San Xosé, esposo da Virxe María, protector de todos os Seminarios.
• San Xoán, apóstolo e evanxelista, irmán de Santiago. Coa idade de moitos dos que aquí estudan, acolleu a chamada que Xesús lle facía para seguilo.
• San Pedro de Mezonzo, bispo de Santiago de Compostela e compositor da Salve Regina.
• San Fernando, rei de España, en honor ao noso fundador, o Cardeal Fernando Quiroga Palacios.

O presbiterio complétase cunha colección de sete vidreiras que representan os sacramentos e o conxunto do altar no que o papa Benedicto XVI celebrou a Santa Misa na súa peregrinación a Santiago no 2010.

As únicas tallas que atoparemos neste lugar, son as do Sagrado Corazón de Xesús (xa que España foi consagrada a el no ano 1919) e da Virxe María. Ela é a patrona principal e titular da nosa institución: Seminario Menor da Asunción (de Nosa Señora aos ceos, por ser nestes anos a definición do dogma).

No edificio atoparemos tamén outros espazos, de diferentes dimensións, adicados a capela. Tales son a Capela de San Xosé, a Capela de internos, a Capela de Atocha e a Capela de peregrinos.