A nosa comunidade educativa viviu hoxe unha xornada moi especial coa inauguración oficial da Semana Cultural, un tempo de encontro, aprendizaxe e celebración das nosas raíces.
Ás 10:00 horas tivo lugar o acto de apertura, que contou coa intervención do Ilmo. Sr. D. José Manuel Taibo García, Reitor do Seminario Menor da Asunción, quen animou ao alumnado a aproveitar estes días como unha oportunidade para medrar non só en coñecementos, senón tamén en valores e identidade.
A continuación celebrouse a conferencia “Un modo de vida, Mel de Galicia”, que contou coa presenza da recoñecida actriz Benedicta Sánchez, protagonista do filme O que arde, dirixido por Óliver Laxe.
O acto estivo presentado por Ester Ordóñez quen pronunciou a conferencia: “Un modo de vida, Mel de Galicia” e que guiou a conversa con proximidade e sensibilidade. A poñente nos mostrou “Un modo de vida”: O filme que homenaxe á apicultura de Galicia no que participa Benedicta e que ten por fin homenaxear á apicultura como oficio e valorizar un produto de calidade diferenciada como é o Mel de Galicia con IXP.
Durante a súa intervención, Benedicta Sánchez compartiu co alumnado a súa experiencia vital e profesional, ofrecendo un testemuño inspirador sobre a importancia das raíces, da conexión coa terra e do valor da vida sinxela.
Cómpre lembrar que en 2020, con 84 anos, Benedicta Sánchez foi galardoada co Premios Goya á Mellor Actriz Revelación, converténdose na actriz de maior idade en conseguir este recoñecemento nesta categoría.
A conferencia deixou unha profunda pegada entre os asistentes, que puideron coñecer de primeira man unha historia de superación, autenticidade e amor pola nosa cultura.
Ás 14:30 horas tivo lugar a apertura dos museos e das distintas exposicións preparadas con moito esforzo e ilusión por parte do alumnado e das súas familias.
Baixo o título “Como cambiou o traballo dos nosos avós”, puidemos descubrir ferramentas e utensilios empregados en antigos oficios, comprendendo mellor o esforzo e a dedicación que caracterizaban a vida doutras xeracións.
A mostra “Ferramentas e oficios antigos” permitiu achegarnos a profesións tradicionais que forman parte da nosa historia colectiva, mentres que a exposición “As nosas raíces” reuniu fotografías e obxectos achegados polas familias do alumnado, creando un espazo cheo de memoria, emoción e identidade compartida.
Esta primeira xornada da Semana Cultural foi, sen dúbida, un éxito de participación e un fermoso exemplo de comunidade educativa unida arredor da cultura, da tradición e do orgullo polas nosas raíces.