Uxía Senlle homenaxea a Begoña Caamaño no Seminario Menor A Asunción de Santiago
A recoñecida artista ofrecerá unha charla o vindeiro 18 de maio ás 16:30 horas.
O acto enmárcase na celebración das Letras Galegas 2026, dedicadas este ano á escritora e xornalista viguesa.
No marco das celebracións polo Día das Letras Galegas 2026, o Seminario Menor A Asunción de Santiago de Compostela terá o orgullo de recibir á destacada cantante e activista cultural Uxía Senlle. A cita terá lugar o vindeiro luns 18 de maio, ás 16:30 horas, no salón de actos do centro.
A xornada centrarase na figura de Begoña Caamaño, autora á que se lle rende tributo este ano desde a Real Academia Galega. Uxía, que compartiu unha fonda amizade e proxectos vitais coa homenaxeada, ofrecerá unha visión persoal e artística sobre o legado dunha das voces máis singulares e necesarias da nosa literatura contemporánea.
Unha viaxe pola “Circe” e a “Morgana” de Caamaño.
Durante a charla, Uxía debullará a importancia do compromiso feminista e a reconstrución dos mitos clásicos que caracterizaron a obra narrativa de Caamaño, autora de títulos imprescindibles como Circe ou o pracer do azul e Morgana en Esmelle.
“A voz de Begoña segue a ser un facho de luz para a nosa cultura”, adianta a artista. “Lembrala é celebrar a coherencia, a sororidade e a calidade literaria que nos deixou como herdanza”.
Entrada: Libre ata completar capacidade (prioridade para a comunidade educativa).
Esta actividade busca achegar ao alumnado e ao público xeral a riqueza da lingua galega a través de dúas figuras femininas clave: unha desde a palabra escrita e outra desde a palabra cantada.
O próximo mércores 13 de Maio, o alumnado de 2.º, 3.º, 4.º da ESO de ciencias van realizar realizar unha saída didáctica ao Parque tecnolóxico de Galicia en Ourense a asistir á Feira Científica máis importante da nosa comunidade e que versa este ano sobre ciberseguridade. Esta actividade forma parte dun traballo previo na aula, no que o alumnado investigou e reflexionou, superando retos exitosamente. Como culminación deste traballo, organizamos esta visita que lles permitirá entrar en contacto directo con contidos científicos e experiencias interactivas vinculadas á Ciberseguridade.
