Fai xa dez anos, alá polo 2013, que para honrar ao copatrón do Seminario Menor quixemos dar paso ao inicio dunha Semana Cultural no noso Centro. Certamente, observaredes que a titular, e quen da nome á nosa institución, é Nosa Señora, a Nai de Deus, a quen invocamos contemplándoa na súa Asunción aos ceos. Pero tamén é certo, que non se nos escapa que a construción deste edificio que nos acolle iniciou a súa andadura un 1 de marzo do ano 1953, festa de San Rosendo. Non era casualidade; recollíase así o desexo do Cardeal Quiroga Palacios, o noso fundador, de encomendar esta institución ao coidado dun dos grandes santos da Galicia medieval.
Para refrescar a memoria, digamos que San Rosendo, nado en Santo Tirso (no norte do actual Portugal) no ano 907 no seo dunha familia nobre, foi un dos grandes persoeiros da nosa terra. Coma a el lle gustaba repetir, era un simple monxe por vocación, mais tamén chegaría a ser bispo por obediencia. Efectivamente, compaxinou a súa vida monacal en Portomarín e no mosteiro de Celanova (fundado directamente por el) coa atención das dioceses do que hoxe son Mondoñedo e Santiago de Compostela. A súa figura pasou a ser un referente da época tanto no plano político (pois chegaría a ser virrei de Galicia) coma relixioso (xa que numerosos mosteiros da propia Ribeira Sacra tomarán a súa entrega a Cristo como modelo a imitar). Non nos debe estrañar pois que o seu legado chegue ata os nosos días.
Dende o Seminario unímonos a este celebración e damos grazas a Deus pola súa vida. Fixémolo a comunidade de seminaristas coas Primeiras Vésperas Solemnes, na tardiña do xoves, e toda a comunidade escolar, cos distintos actos do venres. Tras unha fermosa conferencia de Dª. Alexandra Seara, xerente do Consorcio de Turismo da Ribeira Sacra, celebramos a Eucaristía presidida polo Sr. Arcebispo e concelebrada, entre outros, polo Sr. Bispo Auxiliar. A xornada rematou cun xantar de confraternidade.
Pinchando sobre a imaxe poderás ver distintos momentos da xornada.