Fai uns meses atopabámonos coa triste noticia do pasamento de D. José Dieguez, bispo emérito de Tui-Vigo e antigo reitor do noso Seminario Menor. Hoxe sorprendíanos outra triste nova: o pasamento do que foi reitor desta institución entre os anos 1996 e 2001, D. José Iglesias Costas.
Son moitos os que gardan na súa memoria incontables anécdotas vividas durante eses anos, nos que se afanou por intentar servir a Igrexa na entrega boa e xenerosa a esta casa. Varios dos actuais empregados, tanto no Claustro de Profesores coma no Persoal de Servizo, comezaron aquí a súa andadura baixo a súa batuta.
Natural da parroquia de San Andrés de O Hío, tras ingresar no Seminario de Santiago continúa a súa formación na Universidade de Comillas, na que fará grandes amizades. Os primeiros anos desenvolverá o seu ministerio sacerdotal en Madrid, para reincorporarse á diocese na atención pastoral da Comarca do Eume. Párroco durante catorce anos en San Francisco Xavier da Coruña, deixará a cidade herculina para dirixir o Seminario Menor en Santiago e voltar, a partir do ano 2001 á súa terra do Morrazo, encargándose das parroquias de San Martiño de Bueu (2001-2008) e Santa María do Porto de Marín (2008-2015).
Retirado por enfermidade, pasou os seus últimos anos na Casa Sacerdotal de Santiago, onde finou na madrugada do 19 de setembro. As exequias terán lugar na mañá do martes 20, ás 12:00 horas, en San Andrés de O Hío.
Dende aquí, encomendámolo á misericordia do Pai ao tempo que agradecemos a Deus todo o que nos regalou a través da súa persoa e ministerio.
Descanse en paz.