O pasado 17 de maio celebrábase na nosa comunidade autónoma o Día das Letras Galegas, adicado este ano a figura de Filgueira Valverde, home dunha profunda fe, moi vinculado a comunidade parroquial de Santa María a Maior de Pontevedra, gran impulsor do Museo da Diputación de dita provincia e un dos apaixoados defensores da lingua e cultura galegas.
O Seminario Menor non pode permanecer alleo a dita efeméride, polo que ven de organizar varios actos para afondar na figura deste estudioso e na lingua que impulsou:
O luns e o mércores, os distintos cursos teñen a oportunidade de visitar dúas pequenas exposicións no mesmo centro e responder a uns cuestionarios sobre esta temática. A primeira delas foi elaborada a partires dos materias que editou a Xunta de Galicia, mentres que a segunda é unha recopilación de traballos realizados polos propios alumnos. A “investigación” completarase coa visualización dunha reportaxe sobre a figura de Filgueira Valverde.
Na mañá do martes foi a compañía de teatro Talía Teatro, a que se encargou de mostrarnos os prexuízos e a grandeza da nosa fala. Para iso levaron ao escenario a obra Bicos con lingua, que levan representando en distintos escenarios da xeografía galega e española e que conta xa con varios premios e máis de trescentas edicións. O diálogo posterior cos rapaces favoreceu o intercambio de ideas sobre o pasado, presente e futuro da nosa lingua.
No caso do xoves, será o escritor Pepe Carballude o que se achegará para compartir con nós a apaixoante aventura editorial na que está inmerso, deixando para o venres o derradeiro dos actos desta semana. Neste caso, o Acto de fin de Curso dos alumnos de 2º de Bacharelato, que rematan as clases oficiais para centrarse na preparación da Selectividade.