Con tristura recibimos a noticia da profanación do Santísimo e da Capela universitaria da nosa cidade. Trátase dun lugar visitado por moitos dos nosos alumnos nestes últimos anos. Por esa razón, invitámosvos a unirnos ao Acto de desagravio e reparación presidido polo noso arcebispo.
O Seminario Menor adica a xornada deste mércores ao teatro. Será o propio grupo de teatro do centro o encargado de representar Dez Negriños, unha das obras clave da gran Ágatha Christie.
A sesión da mañá, para escolares, xa ten cuberto o cupo, pero a da tarde sigue aberta para cantos queiran participar. A partires das 18:30, e cun fin solidario, cada entrada consistirá nun quilo de alimentos que despois serán entregados a institucións de caridade da nosa cidade.
A maiores, os alumnos do centro, terán distintas visitas culturais, tanto á Catedral coma ao Museo de Ciencias Naturais da USC. Onte achegáronse tamén ata a Cidade da Cultura para visitar Galicia, un relato no mundo.
A xornada completarase cun coloquio deportivo con Pablo Graña e Noel Domínguez, dous grandes do piragúismo, a partires das 13:00 horas e totalmente de balde.
O Seminario Menor da Asunción ven de inaugurar a súa VIII Semana Cultural. Trátase dunha iniciativa coa que queren dar visibilidade a esta institución que leva máis de 60 anos traballando na nosa cidade.
O escritor Neira Cruz, autor de numerosos libros de literatura infantil e xuvenil, foi o encargado de dar o pistoletazo de saída tralas palabras do Sr. Reitor. A conferencia versou sobre a viaxe de Cosme III de Médicis a Compostela, dentro da temática xeral Relatos que marca dita Semana.
Xa pola tarde, Manquiña presentou a súa obra Relatos negros, coa que, dende a vertente humorística, fai un repaso polos misterios da crónica negra de tódolos tempos.
Durante a mañá deste martes, os alumnos do Seminario Menor visitarán a exposición da Cidade da Cultura: Galicia, un relato no mundo. Non será a única exposición que coñezan; eles mesmos prepararon no propio centro outras exposicións inauguradas onte: Agatha Christie, a raíña do crime; Centenario da Revista Nós, relato dunha época e O Camiño Kumano.
Para a tarde estaba preparado un encontro co adestrador do R. C. Deportivo, Fernando Vázquez, antigo alumno do centro. Pero problemas de axenda de última hora impídenlle achegarse no día de hoxe. Queda pendente unha nova data da que daremos conta unha vez concretada.
