Archivos de Etiquetas: exposición

Nestas semanas librescas que levamos andadas dende o mes de abril, encerellados na literatura, nas letras da poesía e da prosa, aproveitamos para atravesar as fronteiras dos seus territorios afíns, para visitar os seus veciños, a música, a pintura… e ver das relacións de amizade que manteñen entre eles. E resulta que poñemos moita atención no contido, en desentrañar os sentidos de tal poema, de tal canción ou  de tal cadro, o que quixeron os autores que entendésemos nós, e pouca ou ningunha no continente, no soporte que nos achega a ficción ou a realidade, a reflexión ou a evasión, o pasado ou o presente ou o futuro que virá. Ninguén que decotío viva entre libros, e todos vivimos entre libros dun xeito ou doutro, repara nese obxecto composto dunha presa de follas encadernadas que seguramente é, ao mesmo tempo, o artefacto máis sinxelo e o máis sofisticado de todos cantos se teñen creado.

Picados pola curiosidade, o grupo de latín de 4º de ESO andou indagando sobre o caso e, tirando do fío do libro VI das Etimoloxías de san Isidoro de Sevilla, empezaron investigando sobre o significado da mesma palabra “libro”, pois coñecer o sentido das  palabras case sempre aclara todo; seguiron despois cos diferentes soportes e materiais (táboas de cera, papiro, pergameo), para descubrir  como o primeiro monopolio da Antigüidade levou ao primeiro conflito de patentes da historia entre as cidades de Pérgamo e Alexandría; e remataron as súas pescudas vendo a evolución e o perfeccionamento deste aparello co paso do “rolo” (volumen) ao “códice” (codex).

Cos resultados do seu traballo prepararon uns paneis que están expostos nos corredores do claustro. 

Xosé Manuel L. Regueiro