Archivos de Etiquetas: oración

O Seminario Menor vive sempre con tristeza o pasamento de aquelas persoas que dalgún xeito estiveron vinculadas coa nosa historia.

Os sacerdotes que conforman a nosa Arquidiocese están presentes na oración diaria da nosa comunidade e con eles sufrimos e alegrámonos. Por iso, cada vez que chega ata a nós a noticia da morte dalgún sacerdote, pedimos por el ante o Señor na celebración da Santa Misa. Nos últimos días rezabamos por D. Santiago, por D. Walter e, agora, por D. Alejandro.

E, xunto a nosa oración, convén tamén facer unha especial memoria dos que estiveron máis en contacto con nós. Tal é o caso de D. Alejandro Barral, profesor de Historia da Arte no Seminario Menor durante varios cursos. Persoa moi coñecida na cidade de Santiago, estivo vinculado ás parroquias de San Caetano e Santa María da Mercé de Conxo. Coma coengo da nosa Catedral, foi encargado, entre outras cousas, da actualización e mellora do seu Museo, da posta en marcha e apertura ás visitas das súas cubertas, da recuperación dos coros lígneo e petreo que a configuraron, etc. Pero sobre todo, máis que estas obras materiais, foi un dilixente promotor de outro tipo de obras de tipo espiritual que floreceron no acompañamento e coidado de numerosas vocacións e familias; éstas son as obras que agora presentará ante o Pai.

Dende aquí, o noso recoñecemento e oración polo seu eterno descanso.

Na vida do Seminario é esencial a oración coma medio para ter presente e relacionarnos con Deus cada día. Nese sentido, a parte da máis intensa vida de oración que se vive na comunidade de internos, tódolos nosos alumnos comezan as súas clases cunha pequena oración, bendícese a Deus e dáselle gracias polo alimento, temos as nosas celebracións ao longo do curso, etc.

Dentro deste transcurrir do curso escolar, hai algún momentos un pouco máis fortes. Tal é o caso da Exposición prolongada do Santísimo, dende as 8:30 ata as 17:30 deste xoves. Ao longo da xornada, distribuidos por turnos, todos teremos tempo de estar rezando e pasando un rato de intimidade co Amigo que nunca falla.

Tamén este xoves, coma ven sendo habitual tódolos anos, os seminarios Maior e Menor xuntarémonos no Funeral de Benfeitores para orar por todos aqueles que fixeron e fan posible esta realidade educativa que ofertamos. Será ás 20:00 h. na Capela do Seminario Maior. Invitamos dende aquí a tódolos que o desexen a sumarse a esta celebración.