O mes de maio é tradicionalmente chamado o mes de María. Son moitas as institucións e comunidades que ollan dun xeito especial á nosa Naiciña nestes días e celebran no seu honor distintas festas. Unha delas, con gran arraigo popular, é a da Nosa Señora de Fátima.
Conmemórase nestas datas o L aniversario da fundación do Apostolado Mundial de Fátima na nosa diocese e, con tal motivo, a imaxe pergrina de Nosa Señora está a percorrer a nosa cidade durante este mes. Parroquias, hospitais, conventos, asilos e comunidades educativas son testigos desta visita. Onte foi o turno do Seminario Menor.
Na primeira hora, da man dos distintos profesores, os alumnos foron coñecendo a historia e a mensaxe destas aparicións que comezaron en Portugal e (aínda que para moitos, descoñecido) acabaron en Galicia. Fixérono a través do exposto nas aulas e dun vídeo preparado para tal acontecemento.
Despois chegou o momento de acoller todos xuntos a imaxe peregrina da Virxe para dar paso a distintos encontros por cursos nos que rezamos coa oración do Santo Rosario. A xornada concluiu coa procesión ata o convento das Nais Dominicas, onde quedou a imaxe ata a súa marcha ao Hospital Provincial.