Archivos de Etiquetas: papa
Peregrinación a Roma
Na pasada semana, un grupo de alumnos participou na Viaxe-Peregrinación a Roma organizada polo Centro. Ao non ser posible organizalo antes pola situación COVID, uníronse os grupos de 4º ESO e 1º BACH, acompañados dalgúns adultos relacionados coa nosa institución.
Foron días para coñecer o berce da nosa cultura, pero tamén para afondar algo máis na nosa fe a través do testemuño dos mártires e dos apóstolos. Tal e coma nos recordaba o Sr. Reitor, cada monumento fálanos dunha historia gloriosa de tempos pasados e presentes, de xente que, apoiada na súa fe, fixo grandes cousas.
Con esta conciencia visitamos as grandes basílicas, as catacumbas, as prazas, o Coliseo e os foros, os barrios de Roma e os seus parques… Ata houbo tempo para disfrutar dunha tarde de praia e estar moi preto do Papa durante a súa audiencia dos mércores.
Damos grazas a Deus por esta experiencia e tamén pola boa disposición do grupo, que fixeron posible unha das mellores viaxes dos últimos anos. Confiamos en que sexan moitas máis, para seguir facendo comunidade neste noso Seminario Menor.
Oramos pola Paz ante Xesús Sacramentado
Cada trimestre, toda a comunidade educativa do Seminario Menor ten a oportunidade de orar con calma ante Xesús Sacramentado na Exposición prolongada do Santísimo, dando comezo ás 8:30 h. da mañá e concluíndo coa Bendición ás 17:40 h. da tarde.
Nesta ocasión, unímonos ao chamamento que facía o Papa Francisco, aínda que adiantándonos unhas horiñas, para levar a cabo a chamada 24 horas para o Señor. Tamén nos quixemos unir á Consagración de Rusia e Ucraína ao Inmaculado Corazón de María, tal e coma, fai xa 100 anos, Nosa Señora pedía a través dos pastoriños de Fátima.
Tempo pausado para poñernos diante de Deus, presentar as nosas súplicas e intentar abrir o oído do corazón para saber o que El quere de nós.