O Advento é un novo tempo litúrxico que nos invita a centrarnos no esencial. Unha nova chamada para poñer na nosa vida o que vale a pena. Este ano, nunha celebración conxunta de todo o Seminario, no primeiro martes de Advento, fíxose una chamada a ser construtores de paz, seguindo os pasos do Príncipe da Paz.
Canto nos queixamos pola paz! Canto desexamos a paz! Nembargantes que pouco facemos por ela. Queremos que nos territorios onde a guerra está presente, sexa a paz unha realidade. Ao noso redor vemos violencia, crise, escándalos, desánimo, pero nós na nosa casa, no noso colexio, cos nosos amigos, nos sitios e ambientes onde nos movemos,.. son construtor de paz? Somos construtores de paz?
A Igrexa invítanos a mirar ao futuro con esperanza, pero sendo conscientes de que o presente é o noso campo de traballo. Quere que coa nosa vida, co noso testemuño sexamos quenes anunciemos a paz ao mundo enteiro; quere que sexamos coma os anxos que en Belén anunciaron o nacemento do Fillo de Deus; quere que sexamos, xa hoxe, os voceiros dun Deus que se acerca a cada un de nós para espertarnos do sono no que parece que estamos inmersos. El está á porta, chamando por cada un de nós, porque somos importantes para El. Segue a pedir o noso amor, tamén neste Nadal.
Por iso o Advento nos invita a que preparemos a celebración do Nadal. Así deste xeito, poderemos decatarnos que Deus se fixo un de nós. Preparémonos neste Advento para que poidamos cantar con ledicia: “Gloria a Deus no ceo e na terra paz aos homes que gozan do seu amor”.
M. Jesús Formoso
