No día de hoxe, dentro das celebracións organizadas con motivo do Domingo Mundial das Misións (DOMUND) celebrado o pasado domingo 20 de outubro, os nosos alumnos do Seminario Menor e Casa do Neno puideron escoitar de viva voz o testemuño do P. Tomás García, sacerdote mercedario que misionou durante 17 anos na República Dominicana. O traballo que fan os misioneiros ten a súa orixe nunha chamada, a de Deus, e nunha resposta, a do home que busca facer a vontade de Deus e entregar a súa vida ao servizo dos demáis, sobre todo dos máis necesitados. O P. Tomás falounos de como naceu a súa vocación mercedaria e misioneira gracias a unha mestra de Ciencias Sociais e Relixión no colexio no que el estudiou, e como esa vocación o levou á República Dominicana, onde chegou a recibir a ordenación sacerdotal. Contounos que aló, na República Dominicana, encontrouse cunha realidade na que os nenos e nenas teñen que traballar dende idades moi tempranas para axudar á familia, e apenas poden xogar entre eles ou ir á escola. Os misioneiros traballan pola promoción das persoas e pola xustiza social apoiados na fe cristiá e animados polas verbas de Xesús: “Ide e convidade a todos ao banquete”. Xesús chama a todos a participar no gran banquete da Eucaristía. Nós, coma pequenos misioneiros, queremos, coa nosa oración e a nosa solidaridade, que todos os homes e mulleres do noso mundo coñezan a Xesús e se sintan convidados á súa mesa. Foi unha xornada para reflexionar, sensibilizarnos coa realidade das misións, dar gracias a Deus polo que temos e mobilizarnos para axudar aos que máis o precisan.
