Vimos de celebrar o Día de Rosalía e facémolo atendendo a proposta que nos fai a Asociación de Escritores en Lingua Galega: preguntarnos qué diría Rosalía das numerosas inxustizas que sofre o mundo.
Como di o manifesto deste ano:
Dos moitos legados de Rosalía de Castro, destacamos un, o da filósofa que sabe libre o seu pensar e non cede ante as cadeas impostas. Rosalía ensinounos da liberdade do pensamento que se afunde na realidade para interrogala por un futuro mellor. Se só cantamos as pombas e as flores, as luces de cores dos nosos autorretratos dixitais, de que teremos a alma?
Se desoímos os berros do noso tempo, de que teremos a alma?
Pois iso foi o que fixemos estes días nas aulas de lingua, filosofía e valores éticos, escribir sobre as inxustizas do mundo, recordalas, especialmente a Guerra de Ucraína, xusto cando se cumpre un ano do conflicto.
Pero non só falamos de conflitos bélicos, tamén dos interiores, da soidade, da depresión ou da miseria que significa ter que marchar da túa terra. E falamos tamén de xente valente, de persoas como María Ressa, que arriscou a súa vida por combater as noticias falsas e a desinformación ou Dimitri Muratov, xornalista ruso moi crítico con Putin; ambos Premios Nóbel da Paz no 2021.
O resultado desas conversas e reflexións quedaron plasmadas nas paredes do noso centro en forma de poemas, microrrelatos, imaxes, etc.
Begoña Campaña