A excursión pedagóxica organizada para o alumnado de 1º de ESO como peche ao proxecto “Así comezou todo….” partiu desde Santiago de Compostela con destino a Cabana de Bergantiños, onde os estudantes puideron explorar dous importantes xacementos arqueolóxicos da prehistoria galega:
O Dolmen de Dombate, unha impresionante estrutura megalítica, coñecida como a catedral do megalitismo, e o Castro de Borneiro, un asentamento celta que ofreceu aos estudantes unha visión directa da vida na Idade do Ferro.
Tras estas visitas, o grupo regresou seguindo un roteiro que lles permitiu coñecer a Ponte Medieval de Brandomil e as pisadas romanas que seguen na memoria desta localidade, un testemuño da arquitectura romana e medieval galega.
Para culminar o percorrido, os alumnos detivéronse nas Torres de Altamira en Brión, un importante enclave histórico e cultural, que nos permite estudar a través dos restos arqueolóxicos a importancia das fortalezas e construcións que se conservan para entender o modo de vida e a importancia da nobreza galega na Idade Media.
Este percorrido non só foi unha oportunidade para aprender sobre a historia e o patrimonio de Galicia, senón tamén para fomentar o traballo en equipo, a observación e gozar da paisaxe e a cultura local.
O que pensan os nosos alumnos. Crónica:
“O luns 25 de novembro visitamos algún monumentos históricos na provincia da Coruña.
Estes foron: o dolmen de Dombate, o castro de Borneiro, a ponte de Brandomil e as Torres de Altamíra. Nelas coñecemos a súa historia e datos importantes.
Dende a nosa opinión o que máis nos gustou foron as Torres de Altamira, dende elas había unhas vistas moi extensas e eran realmente bonitas.
En cada unha das nosas paradas explicábannos información acerca de cada monumento e nalgúns tiñamos que tomar notas, no Dolmen de Dombate déronos un dossier, que rematamos ao chegar á clase.
En resumo, isto sería un pouco o noso luns, relacionado co megalitismo galego e o noso proxecto.”
Martina Fontán e Lucía López .
