O xoves 23 de abril ás 15.30 tivemos un taller presencial impulsado pola Consellería de Educación, Ciencia, Universidades e Formación Profesional chamado «Menores conectados: educación dixital en ciberseguridade e privacidade», unha iniciativa en colaboración con Amtega dirixida ás familias do alumnado de Primaria de Casa do Neno e de Secundaria e Bacharelato do Seminario Menor. Este programa busca ofrecer ás familias recursos prácticos para acompañar aos nenos e nenas no uso seguro das tecnoloxías, previr riscos en liña, protexer a privacidade e a seguridade en redes sociais, videoxogos e dispositivos móbiles, así como fomentar hábitos saudables de conexión e descanso. O taller resultou de gran interese, xa que este tipo de talleres sempre achegan ideas, recursos e reflexións moi útiles para acompañar ao nopso alumando e famlias no seu desenvolvemento nunha sociedade cada vez máis dixitalizada.
Un alumno do noso centro participa na Olimpíada Matemática.
O noso colexio estivo presente na primeira fase da Olimpíada Matemática 2026, unha iniciativa promovida pola Asociación Galega de Profesorado de Educación Matemática (AGAPEMA), dirixida ao alumnado de 2º da ESO e centrada na resolución de problemas de xeito individual.
Hoxe tivo lugar a fase de zona, na que Bieito, un alumno do noso centro participou representándonos con grande responsabilidade e entusiasmo. A súa implicación, xunto co traballo realizado, deixan unhas sensacións moi positivas tras esta primeira toma de contacto coa competición.
A Olimpíada Matemática consta de varias fases, ofrecendo ao alumnado a oportunidade de avanzar ata a fase nacional. No caso de superar esta primeira etapa, a seguinte cita será a fase final, que se celebrará o vindeiro 21 de maio.
Os resultados desta fase de zona daranse a coñecer ao longo da fin de semana, polo que permanecemos moi pendentes e con moita ilusión. Independentemente do resultado, queremos destacar o esforzo, a actitude e o compromiso amosado, así como felicitalo pola excelente representación do noso colexio.
Parabéns e moita sorte nas seguintes fases!
O Coro do Seminario na TVG.
A Igrexa de San Fructuoso acolleu este pasado domingo, 19 de abril de 2026, unha celebración moi especial que foi retransmitida pola TVG para toda Galicia. A Santa Misa contou coa participación destacada do coro do Colexio Seminario Menor da Asunción de Santiago de Compostela, que puxo voz e solemnidade a unha liturxia seguida por milleiros de fogares.
A celebración estivo presidida por don Manuel Á. Blanco, sacerdote moi querido na comunidade educativa por ter sido formador no Seminario. A súa presenza engadiu un valor emocional á xornada, xa que moitos dos actuais membros do coro e do colexio sentiron unha conexión directa coa súa etapa de formación e co espírito que segue a inspirar a institución.
O coro do colexio brillou cun repertorio coidado e axeitado ao tempo litúrxico, acompañando cada momento da misa con harmonía e sensibilidade. As súas voces, ben ensambladas, contribuíron a crear un ambiente de recollemento e beleza que traspasou a pantalla, achegando a celebración a todos os recunchos de Galicia.
A participación nesta misa televisada supón un motivo de orgullo para o Colexio Seminario Menor da Asunción, que continúa a destacar non só pola formación académica e humana do seu alumnado, senón tamén pola súa implicación na vida litúrxica e cultural. Sen dúbida, unha experiencia inesquecible tanto para os integrantes do coro como para toda a comunidade educativa.
Fonte: https://www.agalega.gal/videos/detail/352013-santa-misa-19-04-2026