Archivos de Etiquetas: 4º ESO

Os alumnos de 4º da ESO están estudando a poesía de posguerra galega e atopamos neste período un personaxe fundamental que é Luís Seoane.  Fundamental non só como autor literario (poeta, autor teatral, narrador…) senón como artista polifacético. Lembremos que, ao igual que Castelao, foi homenaxeado tanto co Día das Letras Galegas, en 1994, como co Día das Artes Galegas o ano pasado.

Fillo de emigrantes en Bos Aires, chega a Galicia con 6 anos. Estuda Dereito en Santiago e colabora na actividade cultural desenvolvida nos tempos das Irmandades da Fala. Co estalido da Guerra Civil volve, esta vez exiliado, a Bos Aires, onde continuará desenvolvendo unha actividade cultural frenética.

Volta a Galicia nos anos 60 e, xunto a seu inseparable amigo, Díaz Pardo, emprende unha das máis ambiciosas empresas culturais que se deron nunca en Galicia. Partindo da unión dos conceptos de Arte e Industria, e tomando como referencia experiencias como a Bauhaus, crean o Laboratorio de Formas. Isto daría lugar á refundación da fábrica de cerámica de Sargadelos e á  creación do Museo de Arte Contemporánea Carlos Maside, do Instituto Galego de Información, das Ediciós do Castro, do Laboratorio Xeolóxico de Laxe e do Seminario de Sargadelos.

Os nosos alumnos, a través dun guión previo, foron descubrindo as distintas facetas de Luís Seoane e atoparon curiosidades como que Bos Aires ten establecida unha ruta turística para visitar os 25 murais que Luís Seoane pintou na cidade, 11 deles situados en lugares públicos (galerías comerciais e teatros) e 14 en halls de edificios particulares, ou que un anuncio publicitario mítico, como é o de Cinzano, era obra súa. A principal fonte de información foi o sitio web da Fundación Luís Seoane da Coruña: https://fundacionluisseoane.gal/gl/

Como mostra da sensibilidade artística e humana de Seoane, deixámosvos esta peciña que o Consello da Cultura Galega creou para a súa exposición Galicia 100. Obxectos para contar unha cultura. Tamén vos animamos a descubrir no noso blog de lectura xente lendo, con motivo do Día das Artes Galegas do ano pasado, a historia que conecta dalgún xeito a Seoane co noso Seminario a través da historia do sacerdote Manuel Espiña e a obra de Seoane “O Cristo obreiro”. 

https://www.youtube.com/watch?v=K1007oNjH3c

Begoña Campaña