Archivos de Etiquetas: letras
Menú poético
Estamos inmersos no Mes das Letras, que deu comezo coas actividades desenvoltas arredor do Día do Libro e rematará coa celebración do Día das Letras Galegas.
Dende o Departamento de Lingua Galega e Literatura estamos desenvolvendo a actividade titulada O POEMA DO DÍA. A xeito de menú poético, os alumnos dos distintos niveis van servindo un poema diario de Xela Arias, poeta homenaxeada coas Letras Galegas deste ano.
A través deses poemas, na aula analizamos as características comúns á poesía duns anos, os 80 e 90, que trouxeron á literatura novas temáticas e formas de expresión.
Remataremos o día 12 de maio cun recital poético musical, similar aos que abundaban naqueles anos.
Begoña Campaña
Como viviches o Día do Libro?
O día 24 de abril, no noso colexio tivemos a sorte de celebrar un Día do Libro moi especial; organizado polas librarías do barrio celebrouse a I Festa do Libro e da Cultura.
Contamos con contacontos para os máis pequenos, recital de poesía, concertos de música, ilustracións, lecturas compartidas, talleres de artesanía, teatro, danza e todo animado polos postos de artesanía , librarías e comida.
A asistencia foi excepcional; despois destes meses de illamento podemos constatar que necesitamos espazos coma este para volver a encontrarnos, para desfrutar con outros da música, dos libros e das artes que tanta compaña nos fixeron nos meses de corentena.
Foi tamén unha oportunidade para que o Seminario de Belvís abrira as súas portas para amosar a beleza do seu interior, dos seus museos e da súa capela.
O barrio de San Pedro é un barrio de xente creativa e acolledora e por iso queremos agradecerlles esta marabillosa iniciativa que esperamos volver a vivir o vindeiro mes de abril.
Yolanda Gómez
Con motivo do Día do Libro
Alfonso X e Pardo Bazán, dúas figuras destacadas
Na xornada do mércores, con motivo do Día do Libro, realizamos cos alumnos de 4º da ESO unha saída para visitar un par de exposicións. Fomos camiñando ata a Igrexa da Universidade e alí desfrutamos da exposición Afonso X e Galicia, na que puidemos comprobar a intensa relación do monarca coa cultura galega. Entre outros moitos materiais, tivemos ocasión de contemplar a edición facsimilar e a transcrición do Códice de Toledo das Cantigas de Santa María.
Despois, na mesma zona vella, asistimos no Pazo de Fonseca á exposición Dona Emilia e Compostela, co gallo do centenario da morte de Emilia Pardo Bazán. Esta mostra afonda na estreita relación entre a escritora e a cidade e as múltiples pegadas que podemos atopar na súa obra.
Unha xornada ben agradable de paseo e cultura.
Begoña Campaña