Archivos de Etiquetas: trilema

Tecendo a Historia. Desafío inicial de 2º ESO

Publicada en de Publicado en: Noticias

O pasado venres inauguramos un novo proxecto en 2º da ESO que recibe o nome de “Tecendo a historia” e vainos levar, a través de varias materias, ao estudo da Idade Media. Como é habitual, comezamos co “Desafío inicial”. Este nome tan suxestivo non é casual, o que se pretende é que as actividades do primeiro día resulten estimulantes e promovan as ganas de saber máis sobre o tema.

O Desafío busca, en boa medida, a sorpresa no alumnado, e o obxectivo conseguiuse desde o primeiro momento, na chegada á propia aula, cuxa entrada simulaba un castelo medieval. O resto da mañá transcorreu fóra, visitando dous espazos moi relacionados co tema: o Pazo de Xelmírez e o Panteón Real na Catedral. Nunha vista guiada, recibiron información sobre a vida no Pazo e a importancia da figura de Xelmírez, e tiveron un primeiro contacto coa historia dos reis de Galicia.

Isto só acaba de empezar, seguiremos tecendo a nosa historia.

Begoña Campaña

Así comezou todo GRRR!

Publicada en de Publicado en: Noticias

Como se fai tradicionalmente ao finalizar un traballo,  tamén os nosos proxectos rematan en festa. Como se dun albaroque se tratase, celebramos a aprendizaxe e os nosos alumnos amosan aos seus pais, amigos ou familiares todo o traballo feito.

En 1º da ESO, tras finalizar o proxecto do ámbito sociolingüístico adicado á Prehistoria, o alumnado recibiu aos seus convidados e amosou as actividades realizadas arredor dese tema: a orixe do ser humano, das linguas, dos mitos,  da literatura popular. Ademais das recollidas nos seus porfolios persoais, puideron explicar múltiples actividades complementarias levadas a cabo ao longo do proxecto: pintura rupestre, saída ao teatro, práctica de arqueoloxía, etc

Este foi o 1º de moitos proxectos que virán despois, xa que formamos parte das “Escolas  que  Aprenden  #EQAp” que propoñen unha nova forma de ensino. Coa participación de varias materias no coñecemento dun tema de xeito transversal, pretendemos que a aprendizaxe sexa integral, que os alumnos interioricen mellor os coñecementos e adquiran ferramentas que lles permitan seguir aprendendo por si mesmos. Conscientes de que é un traballo a longo prazo, os froitos inmediatos resultan satisfactorios, á vista do resultado da Festa da Aprendizaxe vivida.

Begoña Campaña

Entramos a formar parte da rede Escolas que Aprenden

Publicada en de Publicado en: Noticias

Con gran alegría dende este curso escolar  o colexio Seminario Menor xa  forma parte  de  “Escolas  que  Aprenden  #EQAp” unha  rede  crecente  de  escolas  cunha  gran  diversidade:  públicas,  concertadas  e  privadas,  grandes  e  pequenas,  dende  infantil  a  secundaria e FP,  que apoian  os  seus  procesos  de mellora  nun modelo  de  xestión  do  cambio  e  innovación  bautizado  coa  metáfora  de  cubo  Rubik.  Devandito  modelo  é  promovido pola Fundación Trilema. 

Esta fundación,  tras anos  de investigación e  práctica  docente,  consolidou un modelo  pedagóxico  e  educativo,  que  no  noso  centro  púxose  en marcha  no  curso  2021-2022.

Este  Modelo  Trilema  de  innovación  está validado  pola  Universidade  Autónoma  de  Madrid e céntrase na mellora comprometida da vida escolar para alcanzar a excelencia  educativa  e  poder  responder ás  necesidades  dos  alumnos: currículo,  metodoloxías,  avaliación,  organización,  personalización e liderado. Todos eles,  postos ao  servizo  da aprendizaxe integral.

Celebramos o Día Europeo das Linguas

Publicada en de Publicado en: Noticias

O alumnado de 1º da ESO leva xa unhas semanas inmerso nun proxecto titulado “Así empezou todo…..” realizado seguindo o modelo pedagóxico Trilema nas aulas do ámbito sociolingüístico (historia, lingua galega e española fundamentalmente, pero tamén francés, inglés, plástica, educación física…).

Como o título apunta,  trátase de afondar dun xeito integral na evolución do ser humano  e, como elemento esencial desa evolución, estaría a orixe das linguas e a comunicación. Coincidindo co noso proxecto, o luns 26 de setembro celebrouse o Día Europeo das Linguas, instaurado pola Unión Europa no 2001 para poñer en valor a riqueza lingüística do continente e sumámonos á dita celebración. Descubrimos que existen en Europa máis de 225 linguas nativas, ás que habería que engadir outras 100 procedentes doutros continentes que usan a diario persoas inmigrantes. Un mundo de linguas!!

Begoña Campaña

Arrancamos con novos proxectos!!!

Publicada en de Publicado en: Noticias

Durante o pasado curso, o conxunto do profesorado continuou coa súa formación a través da Fundación Trilema. Buscamos afondar nas novas metodoloxías para obter os mellores éxitos no noso alumnado; comezamos a aplicar novas rutinas e dar unha volta á nosa forma de ensinar, sen descoidar todo aquilo que xa nos daba resultado.

Tras esta experiencia cós alumnos de 1º da ESO, decidimos a ampliar este novos métodos, de xeito paulatino, a outros cursos. E arrancamos!

Xa vos iremos contando en que consisten e os nosos avances. Polo de pronto, aquí vos deixamos os títulos dos dous primeiros e, premendo sobre eles, o enlace a algunhas fotografías do desafío inicial:

Así se empezou  Grrrrooooouuuuurrr….!, do ámbito sociolingüístico, con alumnos de 1º ESO.

Todo na súa xusta medida, do ámbito científico-tecnolóxico, con alumnos de 2º ESO.