O segundo trimestre chega a súa fin e, nos derradeiros días, unha vez acabados os exames, teñen lugar unha serie de actividades complementarias de cara ao aprendizaxe dos nosos alumnos. Dende o claustro de profesores consideramos que todas elas supoñen unha importante aportación na educación transversal que queremos para eles.

Así, os alumnos de 3º e 4º da ESO, participaron nun taller sobre expresión corporal e escravitude infantil organizado polo Movemento Cultural Cristiano e que tivo lugar no propio Seminario Menor. Por outra banda, na mañá do xoves, unha pequena representación de dez alumnos do grupo de teatro tiveron oportunidade de visualizar a obra de teatro Xardín Suspenso, do Centro Dramático Galego, xunto a alumnos doutros centros da comarca.

Na naña do venres, o grupo de Humanidades de Bacharelato visitou a exposición A Orixe na Cidade da Cultura, que recolle pezas destacadas de distintos países, sobre a fenomenoloxía xacobea. Namentres, os alumnos da rama científica de Bacharelato e de 4º da ESO, escoitaban e facían as súas aportacións nunha conferencia sobre Física Nuclear organizada no propio centro.

Somentes queda, agora, revisar e asimilar os resultados académicos destes días para corrixir o preciso ou felicitarse polo bo traballo realizado. Os días de descanso desta Semana Santa serán unha boa ocasión para levalo a cabo. Qué mellor forma que facelo que ao carón do que estes días imos rememorar! Nada máis, e nada menos, que a propia Paixón, Morte e Resurrección do Noso Redentor.